ئه‌من چننه جه وه‌رانوه‌رو ته‌بلیغاتی ئه‌مریکایانه‌یوه به‌رمه‌شونه ئه‌ننه‌یچه جه دیماشکراکه‌رده‌ی به‌سه‌رئاماو وێم. جا خو زانای تا‌ریخ ته‌وه‌لودیم به ده‌رده‌و کێ موه‌رو؟ ئه‌گه‌ر په‌ی دیاری که‌رده‌ی رو پێوای بیه‌یمه‌ن مه‌شیو په‌ی وێم موهێم بو هه‌رچه‌ن جه شمه نمه‌شاروشوه فره جارێ لاو فاڵگیراوه فاڵم گێرته‌ونوه به‌ڵام پیشبینیه‌که‌شا هیچ وه‌ختیه دروس به‌ر نامێنێ. ئه‌گه‌ر په‌ی مرخه‌و وانه‌ره‌کا بو مه‌شیو ئه‌وه‌ڵوه لویدێ په‌ی لاو ئه‌یشا و نه‌زه‌ره‌و ئادیشا په‌رستێنه چون ئه‌ر وێم ده‌س وزو وه‌ڵێ پسه‌و ئانه‌ینه که په‌ی چێوه گولانه گه‌وجانه‌کاو ژیوایم نرخ و قیمه‌تم نیابوره. جیا چانه‌یچه فره‌و چێوا هه‌نێ که ئینسان هه‌میشه ته‌لاش مه‌که‌رو جه وه‌رچه‌مگاو چه‌مو یوته‌رانیوه وێش کێشانه که‌رو و پی بونه‌وه لوای په‌ی لاو ئه‌یشا و په‌رسای راوینێشا جه‌باره‌و منوه باشته‌ره‌ن. مه‌سه‌له‌ن خه‌یاتیه باشته‌ر مزانو ئه‌ندازه‌و لاشه‌یم چننه‌ن و پالا ورازو سه‌رو کوڵانێ باشته‌ر مزانو پالاکاو من جه کام لاوه ساویاینێ. ئی چێوانه هه‌میشه من مه‌وزاوه ویرو بازارو ولاخا که وه‌ختێو گه‌ره‌کشانه یابویه پیری وره‌شا و په‌ی ئانه‌یه مشته‌ریێ په‌یدا که‌را به سه‌دایه به‌رز باسو تایبه‌تمه‌ندیه‌کاش یانی عه‌مر، خاسی و خراویش مه‌که‌را. پی گردیوه شه‌رحو به‌سه‌رئاماو من هیچ چیویه وه‌رچه‌مش نیه‌ن چه‌نه. نه کارێوی وه‌رچه‌م روه‌ش داینه، نه پله‌و پایه‌یه به‌رزم بیه‌ن، نه دیپلومێوی موهێم و نه جه مه‌ده‌رسه‌یچه‌نه شاگردێوه زره‌نگ و بلیمه‌ت بیه‌نا به‌ڵکوم چه‌پوانه‌ش هه‌میشه ناکام بیه‌ی به‌شم بیه‌ن. چا ئێدارانا که هه‌رمانه‌م که‌ردێنه ئه‌غڵه‌ب عوزوێوی نادیار و بێ ده‌نگ بیه‌نا و راوه‌به‌ره‌کا‌ما دڵشا ئه‌ننه په‌ر بیه‌ن چه‌نه‌م به جوریه که هه‌ر وه‌خت جه هه‌رمانه‌کێم ده‌سم کێشانوه و ئیستێعفام داینه فره به وه‌شحالێوه قه‌ببوڵشا که‌رده‌ن. به گردی مه‌وجودێوه بێ خه‌یر و به‌ره‌که‌ت قه‌زاوت و په‌یلواو دورو به‌رین جه‌باره‌و منوه‌و گاهه‌سیچ هه‌قێقه‌ت هه‌ر ئینه بو.
